На 5 тысяч студэнтаў болей плянуецца прыняць сёлета ў беларускія ВНУ. І толькі 854 месцы зь іх стануць бюджэтнымі. Агулам зь верасьня студэнцкія білеты атрымаюць 103 тысячы чалавек — гэта рэкордная лічба.
У мінулым годзе ў ВНУ былі прынятыя больш за 97 тысяч новых студэнтаў (каля 85 тысыч у дзяржаўныя ВНУ), а ў 2010 годзе студэнтамі стануць, як плянуе Міністэрства адукацыі, цэлых 103 тысячы чалавек — рэкорд для Беларусі. Аб гэтым заявіў сёньня начальнік упраўленьня вышэйшай і сярэдняй спэцыяльнай адукацыі Міністэрства адукацыі Юрый Міксюк.
Але толькі 17% новых месцаў у ВНУ стануць бюджэтнымі. Агулам толькі кожны трэці студэнт будзе вучыцца на бюджэтным аддзяленьні.
Яшчэ больш гіганцкая лічба аб’ядноўвае ўсіх абітурыентаў, якія пачнуць навучаньне ў беларускіх ВНУ, ПТВ і ССНУ. Такіх міністэрства налічыла 200 тысяч.
Галоўнай асаблівасьцю цяперашняй уступнай кампаніі Міністэрства адукацыі лічыць адсутнасьць новаўвядзеньняў. Нагадаем, што некалькі дзён таму міністар адукацыі Аляксандр Радзькоў агучыў прапанову пашырыць уступную кампанію на ўвесь навучальны год.
падгледзена: generation.by