Міністэрства адукацыі рэкамендавала ў кожным вну арганізаваць абавязковае вывучэнне курсу прафесійнай лексікі беларускай мовы ў аб’ёме 34 гадзін.

Аб гэтым гаворыцца ў адказе намесніка міністра Казіміра Фарино на зварот старшыні грамадскага аб’яднання “Таварыства беларускай мовы імя Францішка Скарыны” Алега Трусова аб выкладанні курсу “Беларуская мова (прафесійная лексіка)”.

Намміністра адзначыў, што прапанова аб абавязковым вывучэнні курсу накіраванае на “удасканаленне падрыхтоўкі кваліфікаваных спецыялістаў, якія павінны авалодаць беларускай мовай на прафесійным узроўні”. У лісце таксама паведамляецца, што да пачатку 2008—2009 вучэбнага года вну “дадзеныя рэкамендацыі па выкладанні названага курсу”.

У інтэрв’ю БЕЛАПАН А.Трусаў выказаў удзячнасць Адміністрацыі прэзідэнта, з дапамогай якой атрымалася захаваць у праграмах усіх ВНУ краіны курс прафесійнай лексікі беларускай мовы. Такім чынам, па словах А.Трусава, айчынныя маладыя спецыялісты будуць ведаць адмысловую тэрміналогію на беларускай мове. “Шкада толькі, што гэты курс, які ў 1990-е гады па патрабаванні ТБМ быў уведзены ў ВНУскія праграмы, скараціўся з 60 гадзін амаль удвая. Аднак мы спадзяемся, што рэктары шэрагу ўніверсітэтаў за рахунак свайго фонду змогуць аднавіць гэты курс у поўным аб’ёме. Толькі ў гэтым выпадку беларускія фізікі, медыкі і матэматыкі будуць добра валодаць прафесійнай лексікай на сваёй роднай мове”, — лічыць спадар Трусаў.

Ён нагадаў, што пасля ўвядзення новых агульнаадукацыйных стандартаў вышэйшай адукацыі Мінадукацыі скасавала курс “Беларуская мова (прафесійная лексіка)”. У гэтай сітуацыі кіраўніцтва ТБМ арганізавала збор подпісаў грамадзян і звярнулася ў Адміністрацыю прэзідэнта з просьбай вярнуць вывучэнне курсу ў внузскія праграмы.

паводле БелаПАН