Учора ў менскім дзіцячым садку па прашпэкце Ракасоўскага ў выніку падзення шафы траўмаваная 3-гадовая дзяўчынка, – з спасылкай на ГУУС паведамляе Інтэрфакс. Удакладнена, што “дзяўчынка з чэрапна-мазгавой траўмай цяжкай ступені, пераломам аснавання звода чэрапа зьмешчана ў рэанімацыйнае аддзяленне 9-й Менскай гарадской клінічнай бальніцы”.
Вучні 6-й клясы школы №5 г. Маладэчна Л. Казлоўскі і С. Цыганкоў у сераду не вярнуліся са школы, – з такой заявай звярнулася маці аднаго з хлапцоў у мясцовы РАУС. Як высветлілася пазьней, тыя паехалі на рынак “Ждановічы”, дзе заначавалі пасля спазьнення на электрацыю. Знойдзеныя ў чацьвер супрацоўнікамі міліцыі, яны мелі пры сабе заплечнік, коўдру, кухонны нож і грошы.
У мінулую пятніцу сышла з школы і не вярнулася дадому вучаніца другой клясы Беларучскай сярэдняй школы Лагойскага раёна. Пошук дзяўчынкі, якую аб’явілі ў рэспубліканскі росшук, вядуць каля 200 ваеннаслужачых і супрацоўнікаў міліцыі.”Рэспубліка” са спасылкай на следчых Лагойскага РАУС адзначае, што 7-гадовая І. Кужэльная жывая і нібыта была заўважаная блізу Астрашыцкага гарадка.
У суседняй Польшчы ўчора каля двухсот вучняў былі эвакуіраваны з будынку школы ў Плонце Касьцёльнай (Падляшша), дзе адбыўся пажар у вентыляцыйным праводзе і моцнае задымленне будынку. Ніхто не пацярпеў. Дырэктарка школы Аліцыя Лапіньска падазрае, што нехта з вучняў выйшаў на перапынку з школы, каб папаліць, і нязгаслы недапалак патрапіў у вентыляцыйны правод. Напэўне, цяпер вучням будзе забаронены выхад на перапынках за будынак, – інфармуе Wirtualna Polska.
Згаданыя падзеі ёсьць толькі зрэзам статыстыкі апошніх гадзін. Да вышэйнапісанага аўтаматычна прыгадваюцца “прыгоды” маленькіх беларусаў у Італіі і ААЭ, і спіс можна доўжыць. Так, няшчасьці здараюцца ня толькі зь дзецьмі, – пераконваюць навінавыя стужкі. Ды й непаўналетнія ўсё ж такі ёсьць часткай агульнае супольнасьці, у якой ніхто ні ад чаго не застрахаваны, але частка найменш абароненая і непадрыхтаваная. “Кветкі жыцьця” штоімгненна могуць стаць ахвярамі неўраўнаважаных і закладнікамі Бесланскае школы. Айчынныя ўлады “ідэалагічна вытрымана” запэўніваюць: амерыканскія трагедыі, расейскі тэрарыстычны гвалт немагчымыя ў краіне белага бусла. Але хто запэўніць, што твае (будучыя, сённяшні студэнт!) дзеткі будуць у бяспецы? Ці адчуваеш ты, безь пяці хвілін маці, СЯБЕ ў бясьпецы?
Учорашні пажар у польскай школе на фоне нашай прапаганды МНС выглядае заканамернасцю (не дарэмна, маўляў, бігборды паўсюль стаяць: “не играй с огнём”). Але ці менш беларускія шкаляры паляць за польскіх? А п’юць?
Зразумела, усе мы ходзім пад Богам, так. Але няўжо мы нічога не можам зрабіць, каб на 3-гадовае дзіця ў дзіцячым садку не падала шафа? Няўжо немагчыма, каб шасьціклясьнікі Лёня і Сяргей ня ехалі ночыць на Ждановічы? Няўжо нельга быць упэўненым, што 7-гадовая Іра спакойна дойдзе дадому?..
Можна нешта зрабіць ці нельга? Напішы, калі ласка, сваё меркаванне. Буду ўдзячны, і можа ня толькі я.
Mikky
